Full resolution (JPEG)
- On this page / på denna sida
- Ynglinga saga
<< prev. page << föreg. sida << >> nästa sida >> next page >>
Below is the raw OCR text
from the above scanned image.
Do you see an error? Proofread the page now!
Här nedan syns maskintolkade texten från faksimilbilden ovan.
Ser du något fel? Korrekturläs sidan nu!
This page has been proofread at least once.
(diff)
(history)
Denna sida har korrekturlästs minst en gång.
(skillnad)
(historik)
Sveigðir tók ríki eptir fǫður sinn. Hann strengði þess heit, at
leita Goðheims ok Óðins ins gamla. Hann fór með xii. mann
víða um heiminn; hann kom út í Tyrkland ok í Svíþjóð ina
miklu ok hitti þar marga frændr sína ok var í þeiri fǫr v. vetr;
þá kom hann aptr til Svíþjóðar; dvalðisk hann þá enn heima
um hríð. Hann hafði fengit konu þá, er Vana hét, út í
Vanaheimi; var þeira sonr Vanlandi.
K. 12. Frá Sveigði.
Sveigðir fór enn at leita Goðheims. Ok í austanverðri
Svíþjóð heitir bœr mikill at Steini; þar er steinn svá mikill
sem stór hús. Um kveldit eptir sólarfall, þá er Sveigðir gekk
frá drykkju til svefnbúrs, sá hann til steinsins, at dvergr sat
undir steininum. Sveigðir ok hans menn váru mjǫk druknir
ok runnu til steinsins. Dvergrinn stóð í durum ok kallaði á
Sveigði, bað hann þar inn ganga, ef hann vildi Óðin hitta.
Sveigðir hljóp í steininn, en steinninn lauksk þegar aptr ok
kom Sveigðir eigi aptr; svá segir Þjóðólfr inn Hvinverski:
4. En dagskjarr
Dúrnis niðja
salvǫrðuðr
Sveigði vélti,
þás í stein
enn stórgeði
Dusla konr
ept dvergi hljóp
ok salr bjartr
þeira Sǫkmímis
jǫtunbyggðr
við jǫfri gein.
K. 13. Frá Vanlanda.
Vanlandi hét sonr Sveigðis, er ríki tók eptir hann ok réð
fyrir Upsala-auð; hann var hermaðr mikill ok hann fór víða um
lǫnd. Hann þá vetrvist á Finnlandi með Snjá inum gamla ok
fekk þar dóttur hans, Drífu. En at vári fór hann á brot, en
Drífa var eptir, ok hét hann at koma aptr á þriggja vetra fresti,
en hann kom eigi á x. vetrum. Þá sendi Drífa eptir Hulð
seiðkonu, en sendi Vísbur, son þeira Vanlanda, til Svíþjóðar.
Drífa keypti at Hulð seiðkonu, at hon skyldi síða Vanlanda til
Finnlandz eða deyða hann at ǫðrum kosti. En er seiðr var
framiðr, var Vanlandi at Upsǫlum; þá gerði hann fúsan at fara
til Finnlandz, en vinir hans ok ráðamenn bǫnnuðu honum ok
sǫgðu, at vera myndi fjǫlkyngi Finna í fýsi hans; þá gerðisk
honum svefnhǫfugt ok lagðisk hann til svefns; en er hann hafði
lítt sofnat, kallaði hann ok sagði, at mara trað hann; menn hans
<< prev. page << föreg. sida << >> nästa sida >> next page >>
Project Runeberg, Sun Dec 10 06:24:58 2023
(aronsson)
(diff)
(history)
(download)
<< Previous
Next >>
https://runeberg.org/heimskring/0021.html
