Full resolution (JPEG)
- On this page / på denna sida
- Saga Hálfdanar svarta
<< prev. page << föreg. sida << >> nästa sida >> next page >>
Below is the raw OCR text
from the above scanned image.
Do you see an error? Proofread the page now!
Här nedan syns maskintolkade texten från faksimilbilden ovan.
Ser du något fel? Korrekturläs sidan nu!
This page has been proofread at least once.
(diff)
(history)
Denna sida har korrekturlästs minst en gång.
(skillnad)
(historik)
þaðan at liði, fór síðan um vetrinn út á Heiðmǫrk; hann hitti
Halfðan svarta í eyinni miklu, er liggr í Mjǫrs; áttu þeir þar
orrostu; þar fell mikit fólk af hvárum tveggja, ok hafði Hálfdan
sigr; þar fell Guthormr, sonr Guðbrandz hersis, er mannvænstr
þótti vera á Uplǫndum; þá flýði enn Eysteinn norðr í Dala. Þá
sendi hann Hallvarð skálk, frænda sinn, til Hálfdanar konungs,
at leita um sættir; en fyrir frændsymi sakir, þá gaf Hálfdan upp
Eysteini konungi hálfa Heiðmǫrk. Hálfdan lagði undir sik Þótn,
ok þar sem Land heitir; þá eignaðisk hann ok Haðaland; var
hann þá ríkr konungr.
K. 3. Kvánfang Hálfdanar konungs.
Hálfdan svarti fekk konu, er nefnd er Ragnhildr, dóttir
Haraldz gullskeggs; hann var konungr í Sogni. Þau áttu son,
er Haraldr konungr gaf nafn sitt, ok fœddisk sá sveinn upp í
Sogni með Haraldi konungi móðurfeðr sínum; en er Haraldr var
orðinn ørvasi, var hann sonlauss; þá gaf hann Haraldi, dóttursyni
sínum, ríki sitt ok lét hann taka til konungs; lítlu síðarr
andaðisk Haraldr gullskeggr. Þann sama vetr andaðisk Ragnhildr,
dóttir hans; eptir um várit varð sóttdauðr Haraldr konungr
ungi í Sogni; hann var þá x. vetra. Þegar er Hálfdan svarti spurði
andlát hans, þá byrjar hann ferð sína með liði miklu ok ferr norðr
til Sogns; var þar við honum vel tekit; talði hann þar til ríkis
ok arfs eptir son sinn, ok var þar engi viðrstaða; lagði hann
undir sik ríki þat. Þá kom til hans Atli jarl inn mjóvi af
Gaulum; hann var vin Halfdanar konungs; konungr setti Atla
jarl yfir Sygnafylki at dœma þar landzlǫg ok heimta saman
skatta. Hálfdan konungr fór þaðan til Uplanda.
K. 4. Orrosta Hálfdanar ok Gandálfssona.
Hálfdan konungr fór um haustit út á Vingulmǫrk; þat var
á einni nátt, er Hálfdan var á veizlu, at um miðnætti kom til hans
sá maðr, er hestvǫrð hafði haldit, ok sagði honum, at herr var
kominn nær bœnum; konungr stóð þegar upp ok bað menn vápna
sik, gengr þegar út ok fylkir. Því næst kómu þar synir Gandálfs,
Hýsingr ok Helsingr, með lið mikit. Varð þar orrosta mikil, en
fyrir því, at Hálfdan konungr var ofrliði borinn, þá flýði hann
til skógs ok lét mart manna; þar fell Ǫlvir inn spaki, fóstrfaðir
Hálfdanar konungs. Eptir þat dreif lið til Hálfdanar konungs,
fór hann þá at leita Gandálfssona, ok hittusk á Eiði við Eyja ok
<< prev. page << föreg. sida << >> nästa sida >> next page >>
Project Runeberg, Sun Dec 10 06:24:58 2023
(aronsson)
(diff)
(history)
(download)
<< Previous
Next >>
https://runeberg.org/heimskring/0047.html
