Full resolution (JPEG) - On this page / på denna sida - Hér hefr upp sǫgu Óláfs konungs Tryggvasonar
<< prev. page << föreg. sida << >> nästa sida >> next page >>
Below is the raw OCR text
from the above scanned image.
Do you see an error? Proofread the page now!
Här nedan syns maskintolkade texten från faksimilbilden ovan.
Ser du något fel? Korrekturläs sidan nu!
This page has been proofread at least once.
(diff)
(history)
Denna sida har korrekturlästs minst en gång.
(skillnad)
(historik)
blása til húsþings; gengu þá allir menn hans af skipum ok fóru
til þings. En er þing var sett, stóð konungr upp ok talaði ok
mælti svá: »vér áttum þing inn á Frostu; bauð ek þá búǫndum,
at þeir skyldu láta skírask, en þeir buðu mér þar í mót, at ek
skylda hverfa til blóta með þeim, svá sem gǫrt hafði Hákon
konungr Aðalsteinsfóstri; kom þat ásamt með oss, at vér skyldim
finnask inn á Mærini ok gera þar blót mikit. En ef ek skal til
blóta hverfa með yðr, þá vil ek gera láta it mesta blót, þat sem
títt er, ok blóta mǫnnum. Vil ek eigi til þess velja þræla eða
illmenni; skal til þess velja, at fá goðunum, ina ágætustu menn;
nefni ek til þess Orm lyrgju af Meðalhúsum, Styrkár af Gimsum,
Kár af Grýtingi, Ásbjǫrn Þorbergsson af Varnesi, Orm af Lyxu,
Haldór af Skerðingsteðju«, — ok þar með nefnir hann aðra v.,
þá er ágætastir váru, segir svá, at hann vill þessum blóta til árs
ok friðar, ok lét þegar veita þeim atgǫngu. En er bændr sá, at
þeir hǫfðu eigi liðskost við konungi, þá biðja þeir sér griða ok
bjóða alt ráð sitt á vald konungs; semsk þat á milli þeira, at
ailir bœndr, þeir er þar váru komnir, létu skírask ok veittu
konungi svardaga til þess, at halda rétta trú, en leggja niðr
blótskap allan. Hafði konungr þá menn þessa alla í boði sínu,
alt þar til er þeir fengu sonu sína eða brœðr eða aðra náfrændr í
gisling til konungs.
K. 68. Frá þingi.
Óláfr konungr fór með ǫllu liði sínu inn í Þrándheim. En er
hann kom inn á Mærini, þá váru þar komnir allir hǫfðingjar
Þrœnda, þeir er þá stóðu mest í móti kristninni, ok hǫfðu þar með
sér alla stórbœndr þá, er fyrr hǫfðu haldit upp blótum í þeim
stað; var þar þá fjǫlment ok eptir því, sem fyrr hafði verit á
Frostuþingi. Lét þá konungr krefja þings, ok gengu
hvárirtveggju með alvæpni til þings, en er þing var sett, þá talaði
konungr ok bauð mǫnnum kristni. Járnskeggi svaraði máli
konungs af hendi bónda, segir hann, at bœndr vildu enn sem
fyrr, at konungr bryti ekki lǫg á þeim — »viljum vér, konungr,
segir hann, at þú blótir, sem hér hafa gǫrt aðrir konungar fyrir
þér«. At hans rœðu gerðu bœndr mikinn róm ok segja, at þeir
vildi alt vera láta, sem Skeggi mælti. Þá segir konungr, at hann
vill fara í hofit ok sjá siðu þeira, er þeir blóta. Bóǫndum líkar
þat vel, fara til hofsins hvárirtveggju.
<< prev. page << föreg. sida << >> nästa sida >> next page >>
