Full resolution (JPEG)
- On this page / på denna sida
- K. 1. Uphaf sǫgu ins helga Óláfs konungs
<< prev. page << föreg. sida << >> nästa sida >> next page >>
Below is the raw OCR text
from the above scanned image.
Do you see an error? Proofread the page now!
Här nedan syns maskintolkade texten från faksimilbilden ovan.
Ser du något fel? Korrekturläs sidan nu!
This page has been proofread at least once.
(diff)
(history)
Denna sida har korrekturlästs minst en gång.
(skillnad)
(historik)
Sóti nefndr, er fyrir þeim réð; hafði Óláfr lið miklu minna ok
skip stœrri. Hann lagði sin skip milli boða nǫkkura, ok var
víkingunum óhœgt at at leggja; en þau skip, er næst lágu
þeim, þá kómu þeir á stafnljám ok drógu þau at sér ok hruðu
þá skipin. Víkingarnir lǫgðu frá ok hǫfðu látit lið mikit. Sigvatr
skád segir frá þessarri orrostu í því kvæði, er hann talði
orrostur Óláfs konungs:
4. Langr bar út enn unga
jǫfra kund at sundi
(þjóð uggði sér síðan)
sæmeiðr (konungs reiði);
(kank til margs) en (manna)
(minni) fyrsta sinni
hann rauð œstr fyr austan
ulfs fót við sker Sóta.
K. 7. Hernaðr í Svíþjóð.
Óláfr konungr helt þá austr fyrir Svíþjóð ok lagði inn í
Loginn ok herjaði á bæði lǫnd. Hann lagði alt upp til Sigtúna
ok lá við fornu Sigtúnir. Svá segja Svíar, at þar sé enn grjóthlǫð
þau, er Óláfr lét gera undir bryggjusporða sína. En er haustaði,
þá spurði Óláfr konungr til þess, at Óláfr Svía-konungr dró
saman her mikinn, ok svá þat, at hann hafði járnum komit yfir
Stoksund ok sett lið fyrir. En Svía-konungr ætlaði, at Óláfr
konungr myndi þar bíða frøra, ok þótti Svía-konungi lítils vert
um her Óláfs konungs, þvíat hann hafði lítit lið. Þá fór Óláfr
konungr út til Stokssunda ok komsk þar eigi út. Kastali var
fyrir austan sundit, en herr mannz fyrir sunnan. En er þeir
spurðu, at Svía-konungr var á skip kominn ok hafði her mikinn
ok fjǫlða skipa, þá lét Óláfr konungr grafa út í gǫgnum Agnafit
til hafs. Þá váru regn mikil. En um alla Svíþjóð fellr hvert
rennanda vatn í Lǫginn, en einn óss er til hafs ór Leginum ok
svá mjór, at margar ár eru breiðari. En þá er regn eru mikil
ok snjánám, þá falla vǫtnin sva œsiliga, at forsfall er út um
Stoksund, en Lǫgrinn gengr svá mjǫk upp á lǫndin, at víða
flóar. En er grǫptrinn kom út i sjáinn, þá hljóp vatnit ok
straumrinn út; lét þá Óláfr konungr á skipum sínum leggja ǫll
stýri ór lagi ok draga segl við hún. Byrr var á blásandi. Þeir
stýrðu með árum ok gengu skipin mikinn út yfir grunnit ok kómu
ǫll heil á hafit. En Svíar fóru þá á fund Óláfs Svía-konungs
ok sǫgðu honum, at Óláfr digri var þá kominn út á haf.
Svía-konungr veitti þeim stórar átǫlur, er gætt skyldu hafa, at Óláfr
kvæmisk eigi út. Þat er nú síðan kallat Konungssund, ok má þar
ekki stórskipum fara, nema þá er vǫtn œsask mest. En þat er
<< prev. page << föreg. sida << >> nästa sida >> next page >>
Project Runeberg, Sun Dec 10 06:24:58 2023
(aronsson)
(diff)
(history)
(download)
<< Previous
Next >>
https://runeberg.org/heimskring/0194.html
