Full resolution (JPEG)
- On this page / på denna sida
- K. 1. Uphaf sǫgu ins helga Óláfs konungs
<< prev. page << föreg. sida << >> nästa sida >> next page >>
Below is the raw OCR text
from the above scanned image.
Do you see an error? Proofread the page now!
Här nedan syns maskintolkade texten från faksimilbilden ovan.
Ser du något fel? Korrekturläs sidan nu!
This page has been proofread at least once.
(diff)
(history)
Denna sida har korrekturlästs minst en gång.
(skillnad)
(historik)
K. 25.
Eiríkr kom á England til fundar við Knút konung ok var
með honum, þá er hann vann Lundúnaborg. Eiríkr jarl barðisk
fyrir vestan Lundúnaborg; þar feldi hann Úlfkel snilling; svá
segir Þórðr:
28. Gollkennir lét gunni
(grœðis hests) fyr vestan
(Þundr vá leyfðr til landa)
Lundún saman bundit;
fekk -regnþorinn Rǫkkva
rann-, of þingamǫnnum,
ýglig hǫgg, þars eggjar,
Ulfkell, bláar skulfu.
Eiríkr jarl var á Englandi einn vetr ok átti nǫkkurar orrostur,
en annat haust eptir ætlaði hann til Rúmferðar, þá andaðisk hann
af blóðláti þar á Englandi.
K. 26. Dráp Eaðmundar.
Knútr konungr átti margar orrostur á Englandi við sonu
Aðalráðs Engla-konungs, ok hǫfðu ýmsir betr. Hann kom þat
sumar til Englandz, sem Aðalráðr andaðisk; þá fekk Knútr
konungr Emmu drótningar; váru bǫrn þeira Haraldr,
Hǫrðaknútr, Gunnhildr. Knútr konungr sættisk við Eaðmund konung;
skyldi hafa hálft England hvárr þeira. Á sama mánaði drap
Heinrekr strjóna Eaðmund konung. Eptir þat rák Knútr
konungr af Englandi alla sonu Aðalráðs konungs; svá segir
Sigvatr:
29. Ok senn sonu
sló hvern ok þó
Aðalráðs eða
út flæmði Knútr.
K. 27. Frá Óláfi ok Aðalráðs-sonum.
Þat sumar kómu synir Aðalráðs konungs af Englandi til
Rúðu i Valland til móðurbrœðra sinna, er Óláfr Haraldzson kom
vestan ór víking, ok váru allir þann vetr í Norðmandi ok bundu
lag sitt saman með þeim skildaga, at Óláfr konungr skyldi hafa
Norðimbraland, ef þeir eignaðisk England af Dǫnum. Þá sendi
Óláfr konungr um haustit Hrana, fóstra sinn, til Englandz at
eflask þar at liði, ok sendu Aðalráðssynir hann með jartegnum
til vina sinna ok frænda, en Óláfr konungr fekk honum lausafé
mikit at spenja lið undir þá, ok var Hrani um vetrinn í Englandi
ok fekk trúnað margra ríkismanna, ok var landzmǫnnum betr
viljat, at hafa samlenda konunga yfir sér, en þó var þá orðinn
<< prev. page << föreg. sida << >> nästa sida >> next page >>
Project Runeberg, Sun Dec 10 06:24:58 2023
(aronsson)
(diff)
(history)
(download)
<< Previous
Next >>
https://runeberg.org/heimskring/0204.html
